අරලියගහ මන්දිරයේදී ජාතික අධ්යාපන කළමනාකරණ තොරතුරු පද්ධතියේ (NEMIS) මානව සම්පත් මොඩියුලය සහ “ඊ-තක්සලාව” ඉගෙනුම් කළමනාකරණ පද්ධතියේ නියමු ව්යාපෘතිය නිල වශයෙන් ආරම්භ කිරීමේ උත්සවය ජූනි 6 වනදා පැවැත්වුණි.
මෙම අවස්ථාවට සහභාගී වූ අග්රාමාත්ය ආචාරිනි හරිනි අමරසූරිය ප්රකාශ කරන ලද්දේ
අධ්යාපනය යනු ගුරුවරයෙක්, විදුහල්පතිවරයෙක්, පරිපාලකයෙක්, ශිෂ්යයෙක් සහ දෙමව්පියන් අතර ඇති සම්බන්ධතාවයකින් ගොඩනගන ක්රියාවලියක් බවයි.
එහි ප්රධානම භූමිකාව ගුරුවරයා සතු බවත්, තාක්ෂණික උපකරණ හෝ වේදිකා පමණක් භාවිතා කිරීමෙන් ඉගෙනුම සිදු නොවන බවත් ඇය පැහැදිලි කළාය.
අග්රාමාත්යවරිය තවදුරටත් කියා සිටියේ, සියලුම පන්ති කාමරවල ස්මාට් බෝර්ඩ් සවි කිරීම අධ්යාපන ප්රතිපත්තියක් ලෙස කිසිදාම අනුමත කර නොමැති බවයි.
ඒ වෙනුවට, අවශ්ය ඉන්ෆ්රාස්ට්රක්චර් සහ උපකරණ සකස් කරමින්, ගුරුවරයාගේ හැකියාව හා අන්තර්ගතය සමග අධ්යාපන ප්රතිසංස්කරණය ගොඩනගන බව ඇය අවධාරණය කළාය.
පොත, පෑන, කළු ලෑල්ල, ස්මාට් බෝර්ඩ් වැනි සියලුම උපකරණ අධ්යාපන ක්රියාවලියට උපකාරී මෙවලම් බවත්, ඒවා ගුරුවරයාගේ භූමිකාව අඩු නොකරන බවත් ඇය අවසන් වශයෙන් සදහන් කරන ලදී.
