පවතින වැසි සහිත කාලගුණ තත්ත්වය හේතුවෙන් දැදුරු ඔය ජලාශයේ වාන් දොරටු හතරක් අඩිය බැගින් විවෘත කර ඇති බව වාරිමාර්ග දෙපාර්තමේන්තුව පවසයි. ඒ අනුව මේ වන විට තත්පරයකට ඝන අඩි 2,800ක ජල ප්‍රමාණයක් දැදුරු ඔයට මුදා හරිමින් පවතින බව එම දෙපාර්තමේන්තුව සඳහන් කර තිබේ.

පවතින වර්ෂාපතනයත් සමඟ ජලාශයට එක් වන ජල ප්‍රමාණය පාලනය කිරීමේ අරමුණින් මෙලෙස වාන් දොරටු විවෘත කර ඇති බව සඳහන් වේ.

මේ හේතුවෙන් ජලාශයට පහළින් දැදුරු ඔය ආශ්‍රිතව පදිංචි ජනතාව විශේෂ අවධානයෙන් පසු විය යුතු බව වාරිමාර්ග දෙපාර්තමේන්තුව දැනුම් දෙයි. දැදුරු ඔයේ ජල මට්ටමේ සිදු වන වෙනස්වීම් පිළිබඳවද අවධානයෙන් සිටින ලෙස ජනතාවට උපදෙස් ලබා දී ඇත.

ඉදිරියේදී ජලාශයට ලැබෙන ජල ප්‍රමාණය සහ වර්ෂාපතනය මත වාන් දොරටු විවෘත කර තබන ප්‍රමාණය තවදුරටත් වෙනස් විය හැකි බැවින්, වාරිමාර්ග දෙපාර්තමේන්තුව සහ ආපදා කළමනාකරණ අංශ නිකුත් කරන නිවේදන අනුව කටයුතු කරන ලෙසද දැනුම් දී තිබේ.