ඉන්ධන අර්බුදය හමුවේ බලශක්තිය සුරැකීම සහ අත්‍යවශ්‍ය සේවා පවත්වාගෙන යාම සඳහා රජය විසින් සෑම බදාදා දිනයක්ම රාජ්‍ය ආයතන සඳහා නිවාඩු දිනයක් බවට පත්කිරීමට තීරණය කර තිබේ.

මෙම තීරණයට අනුගතව දිවයින පුරා ක්‍රියාත්මක වන සියලුම ජාත්‍යන්තර පාසල්, පෞද්ගලික උසස් අධ්‍යාපන ආයතන සහ වෘත්තීය අධ්‍යාපන ආයතන සඳහාද බදාදා දිනය නිවාඩු දිනයක් ලෙස පත්කරන බව අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය නිවේදනය කරයි.

අමාත්‍යාංශ ලේකම් නාලක කලුවැව මහතා විසින් නිකුත් කළ නිවේදනයේ සඳහන් වන්නේ, රජයේ තීරණයට අනුගතව මෙම අධ්‍යාපන ආයතන සියල්ලම ක්‍රියාත්මක විය යුතු බවත්, එමගින් බලශක්තිය සුරැකීම හා අත්‍යවශ්‍ය සේවා පවත්වාගෙන යාමට දායක විය හැකි බවත්ය.

මෙම පියවර මගින් අධ්‍යාපන ක්ෂේත්‍රය තුළ අර්බුදය හමුවේ ජාතික වගකීමක් ඉටු කිරීමටත්, සමාජය තුළ බලශක්ති භාවිතය සුරැකීමටත් ඉඩ සලසන බව අමාත්‍යාංශය අවධාරණය කරයි.