නිල්වලා සහ ගිං යන ගංගා ද්‍රෝණිවල ඇතැම් ප්‍රදේශවල පවතින සුළු ගංවතුර තත්ත්වය තවදුරටත් නොවෙනස්ව පවතින බව වාරිමාර්ග දෙපාර්තමේන්තුව පවසයි. පසුගිය දිනවලට සාපේක්ෂව වර්ෂාපතනයේ යම් අඩුවීමක් පෙන්නුම් කළද, පසුගිය පැය 24 තුළ නිල්වලා ගඟ ඉහළ ප්‍රදේශවල ස්ථාන කිහිපයකට මිලිමීටර් 75ත් 100ත් අතර සැලකිය යුතු වර්ෂාපතනයක් පතිත වී තිබේ.
මේ වන විට නිල්වලා ගඟේ අකුරැස්ස සහ ඊට පහළ ප්‍රදේශවල මෙන්ම, ගිං ගඟ පහළ නිම්නයේ පත්තිගම සහ ඒ අවට ප්‍රදේශවල සුළු ගංවතුර මට්ටමක් වාර්තා වේ. එම ප්‍රදේශවල ජල මට්ටම කැපී පෙනෙන ලෙස ඉහළ නොගියද, පහත් බිම් ආශ්‍රිතව පවතින ජල ගැලීම් අවදානම පහව ගොස් නොමැති බව වාරිමාර්ග දෙපාර්තමේන්තුව පෙන්වා දෙයි.
කළු ගඟේ ඉහළ ප්‍රදේශවල ජල මට්ටම පහත බසිමින් පැවතියද, මිල්ලකන්ද ආශ්‍රිතව තවමත් සුළු ගංවතුර මට්ටමට ආසන්න අගයක් පවතී. කැලණි ගඟ, අත්තනගලු ඔය, මහ ඔය සහ මහවැලි ගඟේ ජල මට්ටම්වල අනතුරුදායක ඉහළ යාමක් මේ වන විට දක්නට නොලැබේ.
තෙත් කලාපයේ ගංගාවල ජල ධාරිතාව තවදුරටත් ඉහළ මට්ටමක පවතින බැවින්, ඉදිරියේදී කෙටි කාලයක් තුළ තද වැසි ඇති වුවහොත් ජල මට්ටම් ක්ෂණිකව ඉහළ යා හැකි බවට අනතුරු අඟවා ඇත. එමෙන්ම ජලාශවල වාන් දොරටු විවෘත කිරීම සම්බන්ධයෙන් නිකුත් කෙරෙන නිල දැනුම්දීම් කෙරෙහි අවධානයෙන් පසුවන ලෙස ගංගා නිම්න ආශ්‍රිත ජනතාවගෙන් ඉල්ලා සිටියි.