ඉන්දියාවේ නැගෙනහිර හිමාල කඳු වැටි ප්‍රදේශයෙන් කුඩා අං සහිත නව ගෙම්බන් විශේෂ පහක් සොයා ගැනීමට විද්‍යාඥයන් කණ්ඩායමක් සමත්ව තිබේ.
දිල්ලි විශ්වවිද්‍යාලය සහ ලෝක ප්‍රසිද්ධ හාවඩ් විශ්වවිද්‍යාලයේ පර්යේෂකයන් පිරිසක් විසින් වසර පහක කාලයක් පුරා අඛණ්ඩව සිදු කරන ලද ගැඹුරු පර්යේෂණවලින් අනතුරුව මෙම නව විශේෂ හඳුනාගෙන ඇත.
මෙම සොයාගැනීමත් සමඟ හිමාල කඳුකර ප්‍රදේශයේ වාසය කරන උභයජීවීන්ගේ පරිණාමීය වේගය මීට පෙර විද්‍යාඥයන් සිතා සිටි ප්‍රමාණයට වඩා බෙහෙවින් වේගවත් හා සුවිශේෂී තත්ත්වයක් පෙන්නුම් කරන බව පර්යේෂකයෝ පෙන්වා දෙති. ජෛව විවිධත්වය අතින් ඉතා වැදගත් වන මෙම කලාපයේ පරිසර පද්ධතිය සහ එහි ජීවීන්ගේ පරිණාමීය රටාවන් අධ්‍යයනය කිරීම සඳහා මෙම නව සොයාගැනීම ඉමහත් පිටුවහලක් වනු ඇත.
