ලිට්‍රෝ ගෑස් සමාගම විසින් මෙරට ගෑස් අර්බුදය මඟහරවා ගැනීම සඳහා ගෙන එන ලද නව ගෑස් තොගයක් රැගත් නෞකාවක් නොවැම්බර් 03 වැනිදා දිවයිනට පැමිණ ඇති බව නිල වශයෙන් ප්‍රකාශ කර සිටී. මෙම නව තොග අද (04) වන දින සිට දිවයින පුරා බෙදාහැරීම ආරම්භ කිරීමට සමාගම කටයුතු යොදා ඇත.
ලිට්‍රෝ සමාගම නොවැම්බර් මාසය සඳහා සමස්තයක් ලෙස ගෑස් මෙට්‍රික් ටොන් 40,000ක් ඇණවුම් කර ඇති බව සමාගමේ ප්‍රකාශකයින් සඳහන් කරයි.
මේ සම්බන්ධයෙන් අදහස් දක්වමින් ලිට්‍රෝ ගෑස් ටර්මිනල් ලංකා සමාගමේ සභාපති හා ප්‍රධාන විධායක නිලධාරී චන්න ගුණවර්ධන මහතා පවසා සිටියේ, දිනකට ගෑස් සිලින්ඩර් 80,000ක් පමණ වෙළෙඳපොළට නිකුත් කිරීමට හැකි වන බවයි.
ඒ අනුව, නොවැම්බර් මාසය තුළ ගෑස් සිලින්ඩර් මිලියන තුනක් පමණ නිකුත් කිරීමේ සම්පූර්ණ හැකියාවක් පවතින බව ද සමාගම විශ්වාසය පළ කරයි. මීට පෙර, ඔක්තෝබර් 18 සිට නොවැම්බර් 01 දක්වා කාලය තුළ නෞකා හතරකින් ගෑස් මෙට්‍රික් ටොන් 15,600ක් ලිට්‍රෝ සමාගමට ලැබී තිබූ බව ද ඔහු වැඩිදුරටත් සඳහන් කළේය.
මේ අතර, දේශීය ගෑස් වෙළෙඳපොළේ තවත් ප්‍රධාන සමාගමක් වන ලාෆ්ස් (Laughs) සමාගම ද නොවැම්බර් මාසය තුළ ගෑස් නෞකා තුනක් ගෙන්වා ගැනීමට සැලසුම් සකස් කර ඇත. සමාගමේ නිල ප්‍රකාශයකට අනුව, මෙම නෞකා නොවැම්බර් 12 සිට 14 දක්වා, 15 සිට 17 දක්වා සහ 24 සිට 28 දක්වා යන කාල පරාසයන් තුළ හම්බන්තොට වරායට පැමිණීමට අපේක්ෂා කෙරේ.
කෙසේ වෙතත්, නෞකාවල ගමන් කාලසටහන්, වරාය මෙහෙයුම් කටයුතු සහ නියාමන ආයතනවල අනුමැතිය මත මෙම දිනයන් වෙනස් විය හැකි බවට ද ලාෆ්ස් සමාගම කල්තියා අවවාද කර සිටී.
