මීගමුව බන්ධනාගාරයේ සිදුවූ මාරාන්තික ගැටුම සම්බන්ධයෙන් ස්වාධීන, විනිවිදභාවයෙන් යුත් සහ කඩිනම් පරීක්ෂණයක් පැවැත්විය යුතු බව දිනන දකුණ සාමූහිකය නිවේදනයක් නිකුත් කරමින් අවධාරණය කර තිබේ.
එම නිවේදනය පහතින්,
”මීගමුව බන්ධනාගාරයේ සිදුවීම: රාජ්යයේ පාලන ධාරිතාව යළි ගොඩනැගීම දැන් ජාතික ප්රමුඛතාවයකි
මීගමුව බන්ධනාගාරයේ සිදුව ඇති මාරාන්තික ගැටුම පිළිබඳව දිනන දකුණ බලවත් කනස්සල්ල පළ කරයි. ජීවිත අහිමි වූවන්ගේ පවුල්වලට අපගේ ශෝකය පළ කරන අතර, සිද්ධිය සම්බන්ධයෙන් ස්වාධීන, විනිවිදභාවයෙන් යුත් සහ කඩිනම් පරීක්ෂණයක් පැවැත්විය යුතු බව අවධාරණය කරමු.
බන්ධනාගාරයක් යනු රාජ්යයේ සෘජු පාලනය යටතේ පවතින ආයතනයකි. එවැනි ස්ථානයක් තුළ පවා ආරක්ෂාව, විනය සහ නීතිය පවත්වා ගැනීමට නොහැකි වන්නේ නම්, එය හුදෙක් එක් සිදුවීමක් නොව රාජ්ය පාලන ධාරිතාවේ දුර්වලතාවක් පිළිබඳ සංඥාවකි.
රටක් යහපත් වන්නේ දූෂිතයන් අත්අඩංගුවට ගැනීමෙන් පමණක් නොවේ. නීතිය ක්රියාත්මක කරන, දඬුවම් පරිපාලනය කරන සහ මහජන ආරක්ෂාව තහවුරු කරන ආයතන වෘත්තීයමය, ස්වාධීන සහ කාර්යක්ෂම ලෙස ක්රියාත්මක විය යුතුය.
විශේෂයෙන්ම, බන්ධනාගාර දෙපාර්තමේන්තුවේ ඉහළම නායකත්වය වන කොමසාරිස් ජනරාල් තනතුරට ස්ථිර පත්කිරීම වසරකට ආසන්න කාලයක් ප්රමාද වී ඇති බවට දිගින් දිගටම කරුණු මතු වී තිබේ. එවැනි තත්ත්වයක් පවතින්නේ නම්, එය ආයතනයේ වගවීම, තීරණ ගැනීම සහ දිගුකාලීන කළමනාකරණය සම්බන්ධයෙන් බරපතළ ප්රශ්න මතු කරයි.
එබැවින් රජය කඩිනමින් පහත කරුණු සම්බන්ධයෙන් පැහැදිලි කළ යුතුය.
- බන්ධනාගාර කොමසාරිස් ජනරාල්වරයෙකු ස්ථිරව පත් කිරීම ප්රමාද වූයේ ඇයි?
- මෙම ගැටුමට හේතු වූ ආයතනික අසාර්ථකත්වයන් මොනවාද?
- බන්ධනාගාර පද්ධතියේ නායකත්වය, බුද්ධි තොරතුරු, ආරක්ෂක කළමනාකරණය සහ අවදානම් පාලනය ශක්තිමත් කිරීමට ගන්නා පියවර මොනවාද?
- මෙවැනි සිදුවීම් නැවත ඇති නොවීමට අවශ්ය ව්යුහාත්මක ප්රතිසංස්කරණ මොනවාද?
ශ්රී ලංකාවට අවශ්ය වන්නේ සටන් පාඨවලින් පාලනය නොව, ශක්තිමත් ආයතන මත ගොඩනැගුණු රාජ්යයකි. නීතියේ ආධිපත්යය සුරක්ෂිත කරමින්, වෘත්තීය රාජ්ය සේවය ශක්තිමත් කරමින් සහ පරිපාලන වගවීම තහවුරු කරමින් රාජ්ය ධාරිතාව යළි ගොඩනැගීම තවදුරටත් ප්රමාද කළ නොහැකි ජාතික වගකීමකි.
දිනන දකුණ සාමූහිකය වෙනුවෙන්,
නායකත්ව මණ්ඩලය සහ විධායක සභාව.”
