2027 අයවැයෙන් රාජ්‍ය සේවකයන්ගේ ඉල්ලීම්වලට ප්‍රමාණවත් ප්‍රතිචාර ලැබී නැතැයි පවසමින් වෘත්තීය සමිති කිහිපයක් හෙට (නොවැම්බර් 23) දිවයින පුරා විරෝධතා පැවැත්වීමට සැලසුම් කර තිබේ. රාජ්‍ය ආයතන, රෝහල් සහ අනෙකුත් සේවා ස්ථාන ඉදිරිපිට පැවැත්වීමට නියමිත එම විරෝධතාවලට ගුරු, විදුහල්පති සහ සෞඛ්‍ය සේවක වෘත්තීය සමිති එක්වීමට සූදානම් වේ.

සේවක අරගල මධ්‍යස්ථානය පවසන්නේ නොවැම්බර් 30 වැනිදා සිට ක්ෂේත්‍ර අනුව වර්ජන ක්‍රියාමාර්ග ගැනීමටද සැලසුම් කර ඇති බවයි. ඇතැම් ක්ෂේත්‍රවල එක්දින වර්ජනත්, තවත් ක්ෂේත්‍රවල දෙදින වර්ජනත් සැලසුම් කර ඇති අතර, රජයෙන් ප්‍රමාණවත් ප්‍රතිචාරයක් නොලැබුණහොත් ක්‍රියාමාර්ග තවදුරටත් පුළුල් කරන බව එම මධ්‍යස්ථානය සඳහන් කර තිබේ.

මේ අතර, ගුරු සහ විදුහල්පති වෘත්තීය සමිති කිහිපයක් නොවැම්බර් 30 වැනිදා දීපව්‍යාප්ත එක්දින වර්ජනයකට යෑමට තීරණය කර තිබේ. එදින ගුරුවරුන් සහ විදුහල්පතිවරුන් අසනීප නිවාඩු වාර්තා කිරීමට සැලසුම් කර ඇති බව ලංකා ගුරු සංගමය පවසයි. අධ්‍යාපන අමාත්‍යාංශයේ වැය ශීර්ෂය දෙසැම්බර් 1 වැනිදා පාර්ලිමේන්තුවේදී විවාදයට ගැනීමට නියමිත අතර, අයවැය ක්‍රියාවලියේ ඉතිරි අදියර තුළ සිය වැටුප් ඇතුළු ඉල්ලීම් සලකා බලන ලෙස එම සමිති රජයෙන් ඉල්ලා තිබේ.