කොළඹදී අද (11) ආරම්භ වූ පළමු බිම්ස්ටෙක් (BIMSTEC) සෞඛ්‍ය අමාත්‍යවරුන්ගේ හමුවට සහභාගී වීම සඳහා ඉන්දීය සෞඛ්‍ය හා පවුල් සුබසාධන අමාත්‍ය ජගත් ප්‍රකාශ් නද්දා මහතා ශ්‍රී ලංකාවට පැමිණ තිබේ. ‘1990 සුවසැරිය’ සේවයට නව ගිලන් රථ 100ක් මිලදී ගැනීම සඳහා ඉන්දීය මූල්‍ය ප්‍රදානයක් ලබාගැනීමට අදාළ අවබෝධතා ගිවිසුම ද මෙම සංචාරය අතරතුර අත්සන් කිරීමට නියමිතය.
ශ්‍රී ලංකාවේ සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා හමුවේ සභාපති ධුරයට තේරී පත්ව තිබේ. බිම්ස්ටෙක් සාමාජික රටවල් හතේ නියෝජිතයන් එක්වන මෙම හමුවේ අරමුණ කලාපීය මහජන සෞඛ්‍ය සහයෝගිතාව ශක්තිමත් කිරීමයි. අමාත්‍ය හමුවට පෙර ජ්‍යෙෂ්ඨ සෞඛ්‍ය නිලධාරීන්ගේ රැස්වීම ඊයේ (10) කොළඹදී පැවැත්විණි.
සුවසැරිය සඳහා වෛද්‍ය උපකරණ සහිත නව ගිලන් රථ 100ක් මිලදී ගැනීමට ඉන්දියාවෙන් රුපියල් මිලියන 1,725.7ක ප්‍රදානයක් ලබාගැනීමට නියමිත බව අමාත්‍ය නලින්ද ජයතිස්ස මහතා ඊයේ පැවති කැබිනට් මාධ්‍ය හමුවේදී පැවසීය. අදාළ අවබෝධතා ගිවිසුමට අත්සන් තැබීම සඳහා අමාත්‍ය මණ්ඩල අනුමැතිය ලැබී ඇති අතර, ගිලන් රථ සැපයුම්කරුවන් තරගකාරී ටෙන්ඩර් ක්‍රියාවලියකින් තෝරාගැනීමට නියමිත බවද ඔහු සඳහන් කළේය. ගිවිසුම අත්සන් කළ බවට නිල තහවුරු කිරීමක් මෙතෙක් ප්‍රසිද්ධ වී නැත.
2016දී ඉන්දීය මූල්‍ය ප්‍රදානයකින් ආරම්භ කළ ‘1990 සුවසැරිය’ නොමිලේ හදිසි ගිලන් රථ සේවය 2018දී දිවයින පුරා ව්‍යාප්ත කෙරිණි. එහි දැනට පවතින ගිලන් රථ 322ක ඇණිය ශක්තිමත් කිරීමට නව රථ යොදා ගැනීමට සැලසුම් කර තිබේ.
