ශ්‍රී ලංකාව ලංකාවේ අපනයන ක්‍රියාවලිය පහසු කිරීම සඳහා ජාතික වෙළෙඳ ඒක කවුළු පද්ධතිය නොවැම්බර් 5 වැනිදා ආරම්භ කෙරිණි. මුදල්, ක්‍රමසම්පාදන සහ ආර්ථික සංවර්ධන අමාත්‍යාංශයේ මෙහෙයවීමෙන් ක්‍රියාත්මක වන මෙම වැඩසටහනේ මුල් අදියරට තේ සහ පොල් අපනයන ක්ෂේත්‍ර තෝරාගෙන තිබේ.

ආරම්භක අවස්ථාවට එක්වූ පෞද්ගලික අංශයේ ව්‍යාපාර විසින් නව පද්ධතිය හරහා පළමු රේගු ප්‍රකාශය හෙවත් CusDec සාර්ථකව සකස් කර ඇති බව වාර්තා වේ.

මෙම ඒක කවුළු ක්‍රමයේ අරමුණ වන්නේ වෙළෙඳ කටයුතුවලට අවශ්‍ය ලේඛන සහ දත්ත අපනයනකරුවන් හා නියාමන ආයතන අතර එක් ඩිජිටල් දොරටුවක් ඔස්සේ හුවමාරු කිරීමට පහසුකම් සැලසීමය.

අපනයනකරුවන් පද්ධතියට එක්කරගැනීම ක්ෂේත්‍ර අනුව අදියරෙන් අදියර සිදුකෙරේ. මුල් අදියරේ අත්දැකීම් සහ හඳුනාගන්නා අවශ්‍යතා අනුව පද්ධතිය තවදුරටත් වැඩිදියුණු කර අනෙකුත් ව්‍යාපාරික ක්ෂේත්‍ර සඳහාද විවෘත කිරීමට අමාත්‍යාංශය අපේක්ෂා කරයි.

පෞද්ගලික ව්‍යාපාර, වාණිජ මණ්ඩල නියෝජිතයන්, රාජ්‍ය ආයතන, GovTech සහ Lanka Software Foundation මෙම වැඩසටහන ක්‍රියාත්මක කිරීමට දායක වී ඇත.