රට ලොක්ඩවුන් කිරීම ‘කළුවා මාරපන ගියා’ වැනි කිසිදු සැලසුම් සහගත ක්‍රියාවලියකට අනුව සිදුකර නැතැයි සමස්ත ලංකා වෛද්‍ය නිලධාරීන්ගේ සංගමයේ ප්‍රධාන ලේකම් වෛද්‍ය ජයන්ත බණ්ඩාර පැවසීය.
වෛද්‍යවරයා පෙන්වා දෙන්නේ, ලොක්ඩවුන් කාලසීමාව තුළ ක්‍රියාත්මක විය යුතු නිර්දේශ කිහිපයක් ලෝක සෞඛ්‍ය සංවිධානය විසින් ඉදිරිපත් කර ඇති නමුත් ඒවා කිසිවක් නිසිපරිදි ක්‍රියාත්මක නොවන බවය.
ඒ අනුව වෛරස ව්‍යාප්තිය පාලනය කිරීම, සෑම ආසාදිත පුද්ගලයෙකු ම සොයා ගැනීමට පරීක්ෂණ සිදුකිරීම, ඔවුන් වෙන් කිරීමට හා එම පුද්ගලයාගේ සියලු ආශ්‍රිතයන් සෙවීම, සෞඛ්‍ය ආයතන වැනි ස්ථානවල හදිසි අවශ්‍යතා මතුවීමේ අවදානම අවම කිරීම, වැඩබිම්, පාසල් සහ වෙනත් ස්ථානවල රෝගය වැළැක්වීමේ උපක්‍රම තර කර තිබීම, ජනතාව උපරිමයෙන් දැනුවත් කිරීම, බාහිරින් රට තුළට ආසාදිතයන් පැමිණීමේ අවදානම පාලනය කිරීම යන කාරණා සම්පූර්ණ නොකළහොත් අපට ලොක්ඩවුන් එක සාර්ථක කරගත නොහැකි බව ද ඒ මහතා කීය.
එම නිසා මෙම ලොක්ඩවුන් කිරීම සැලසුම් සහගත හා විද්‍යාත්මක ක්‍රමවේදයක් හරහා නොකර ඇති බව පෙනී යන්නේ යැයි ද හෙතෙම වැඩිදුරටත් සඳහන් කළේය.
