ගම්පහ දිස්ත්රික් සණස සංගමයේ තැන්පත්කරුවන්ට මුදල් ආපසු ලබාදීම සඳහා සංගමය සතු වත්කම් තක්සේරු කර විකිණීමේ හැකියාව සොයා බැලීමට රජයේ ගිණුම් පිළිබඳ කාරක සභාව යටතේ පත් කළ අනුකමිටුවේ අවධානය යොමු වී තිබේ.
සමූපකාර ක්ෂේත්රයේ අර්බුද පිළිබඳ සොයා බලන මෙම අනුකමිටුව, පාර්ලිමේන්තු මන්ත්රී රුවන්තිලක ජයකොඩි මහතාගේ සභාපතිත්වයෙන් නොවැම්බර් 16 වැනිදා රැස්විය.
පාර්ලිමේන්තුව නිකුත් කළ නිවේදනය අනුව, සංගමයේ කළමනාකරණ දුර්වලතා සම්බන්ධ විගණකාධිපති වාර්තාවේ කරුණු එහිදී විමර්ශනයට ලක්කර ඇත. අවශ්ය අනුමැතියකින් තොරව පෞද්ගලික ආයතනවල මුදල් ආයෝජනය කිරීම හේතුවෙන් සාමාජිකයන්ගේ මෙන්ම බාහිර තැන්පත්කරුවන්ගේ මුදල් ආපසු ගෙවීමට නොහැකි තත්ත්වයක් මතුව ඇති බව සාකච්ඡාවේදී අනාවරණය වූ බව එහි සඳහන් වේ.
වත්කම් බැහැර කිරීමට බලපාන අධිකරණ තහනම් නියෝග ඉවත් කරගැනීමට අවශ්ය නීතිමය පියවර සහ දැනට පවතින මුදල් තැන්පත්කරුවන් අතර සාධාරණ පදනමකින් බෙදාදීම පිළිබඳවද අනුකමිටුව සාකච්ඡා කර තිබේ.
අනුමැතියකින් තොරව කළ ආයෝජනවලට වගකිව යුතු හිටපු අධ්යක්ෂ මණ්ඩල සාමාජිකයන්ගෙන් අධිභාර අයකර ගැනීමත්, අදාළ පෞද්ගලික සමාගමට එරෙහිව නීතිමය ක්රියාමාර්ග ගැනීමත් එහිදී සලකා බලා ඇත. නිම නොකළ ව්යාපෘති අවසන් කර ආදායම් උපයාගැනීමේ හැකියාවද සාකච්ඡාවට ලක්විය.
තැන්පතු මුදල් සම්පූර්ණයෙන් ආපසු ගෙවීම සඳහා පැහැදිලි හා ප්රායෝගික ක්රමවේදයක් සකස් කිරීමේ අවශ්යතාව අනුකමිටුව අවධාරණය කර තිබේ. කෙසේ වෙතත්, ගෙවීම් ආරම්භ කරන දිනයක් හෝ තැන්පත්කරුවන්ට ලැබෙන මුදල් ප්රමාණයන් පිළිබඳ අවසන් තීරණයක් එම නිවේදනයේ සඳහන් නොවේ.





