මාතලේ දිස්ත්‍රික්කයේ සුළු අපනයන භෝග ගොවීන්ගේ නිෂ්පාදන සඳහා නව ආර්ථික මධ්‍යස්ථානයක් සංවර්ධනය කිරීමට සැලසුම් කර ඇති බව අමාත්‍ය වසන්ත සමරසිංහ මහතා පැවසීය.

මාතලේ සමුපකාර ග්‍රාමීය බැංකුව සතු දේපළක් ආශ්‍රිතව මෙම ව්‍යාපෘතිය ක්‍රියාත්මක කිරීමට නියමිත අතර, දිස්ත්‍රික් සංවර්ධන කමිටුවේ යෝජනාවක් අනුව එය ඉදිරිපත් කර ඇති බවද ඔහු සඳහන් කළේය.

මෙම මධ්‍යස්ථානය තුළ ගොවීන්ගේ නිෂ්පාදන මිලදී ගැනීම, සැකසීම, ඇසුරුම් කිරීම සහ දේශීය මෙන්ම විදේශීය වෙළඳපොළට යොමු කිරීම සඳහා අවශ්‍ය පහසුකම් ස්ථාපිත කිරීමට සැලසුම් කර තිබේ. ගම්මිරිස්, කුරුඳු ඇතුළු සුළු අපනයන භෝග වටිනාකම් එකතු කර අපනයනයට සූදානම් කිරීම මෙන්ම සංචාරකයන්ටද ඒවා මිලදී ගැනීමේ පහසුකම් සැලසීම මෙහි අරමුණයි.

අමාත්‍යවරයා සඳහන් කළේ මෙම ව්‍යාපෘතිය මඟින් මාතලේ ප්‍රදේශයේ ආර්ථිකය ශක්තිමත් කිරීම, ගොවීන්ගේ ආදායම් ඉහළ නැංවීම සහ රටේ අපනයන ආදායම වැඩි කිරීම අපේක්ෂා කරන බවයි.

අදාළ යෝජනාව මේ වන විට සකස් කරමින් සිටින අතර, සමුපකාර අංශය, National Agribusiness Services සමාගම සහ රජයේ ආයතන එක්ව එය කඩිනමින් ආරම්භ කිරීමට කටයුතු කරන බවද ඔහු වැඩිදුරටත් පැවසීය.