පාර්ලිමේන්තුවේ රහස් ඡන්දයක් තබා තම ආණ්ඩුවේ තත්ත්වය මැන ගන්නා ලෙස සමගි ජන බලවේගයේ පාර්ලිමේන්තු මන්ත්‍රී පාඨලී චම්පික රණවක මහතා ජනාධිපතිවරයාගෙන් ඉල්ලා සිටියි.
අද (ඔක්තෝබර් 28) පැවැති මාධ්‍ය හමුවකට එක්වූ රණවක මහතා සඳහන් කළේ දෙවැනි ලෝක මහා සංග්‍රාමයෙන් පසු ඉතිහාසයේ පළමු වතාවට රට සාගතයක් කරා යොමුවෙමින් පවතින බවය.
අත්‍යාවශ්‍ය ආහාර ද්‍රව්‍යවල මිල ගණන් අහස උසට නගිමින් තිබේ. ඊට හේතුවී ඇත්තේ පවතින එළවළු සහ පළතුරු හිඟයයි. මහ කන්නය පිළිබඳ ඇතිව තිබෙන දෙගිඩියාව හේතුවෙන් සහල් මිල ගණන් අහස උසට නගිමින් තිබේ. දෙසැම්බර් මාසය වනවිට පවතින ප්‍රමාණයටත් වඩා විශාල පරිමාණයෙන් වැඩි වීමට නියමිතය. බඩඉරිඟු වගාව වැනි ඒ හා බැඳී තිබෙන කුකුල් මස් සහ බිත්තර සැපයීම අඩාල වීම නිසා කුකුල් මස්, බිත්තර වැනි දෑ ඉතා ඉහළ මිල ගණන් වලට ගමන් කරමින් තිබේ. රටේම ජනතාව දරාගත නොහැකි සාගත තත්ත්වයකට ගමන් කරමින් සිටී.
“අනෙක් පැත්තෙන් මේ රටට ඩොලර් මිලියන එක්දාස් තුන්සීයක් පමණ උපයා දීපු තේ, පොල්, රබර්, කුරුඳු වැනි අපේ අපනයන බෝග වලට බරපතළ අභියෝගයක් එල්ල වෙලා තියෙනවා. විශේෂයෙන්ම අපේ තේ වෙළඳාම නාමය හා නාමය සම්පූර්ණයෙන්ම බිඳ වැටිලා අපේ තරඟකරුවන්ට ඒ ස්ථානය හිමිවෙන්න යනවා. මොකක්ද මේකට හේතුව? මේකට හේතුව පසුගිය මාර්තු මාසයේ ජනාධිපතිවරයා ගත්ත තීරණයත් අනුව පසුගිය මැයි මාසේ හය වැනිදා නිකුත් කරන ලද ගැසට් නිවේදනයකින් ශ්‍රී ලංකාවට පොහොර ගෙන්වීම රසායන ද්‍රව්‍ය ගෙන්වීම හා බීජ ගෙන්වීම තහනම් කිරීම නිසා ඇතිවෙච්ච තත්ත්වයක්.”
කාබනික ගොවිතැන හොඳ දෙයක් නමුත් ඊට අවශ්‍ය ද්‍රව්‍යවල මිල ගණන් සාමාන්‍ය ජනතාවට ඔරොත්තු නොදෙන බව තමන් විසින් පෙන්වා දුන් බවත්, විද්‍යාඥයන්, කෘෂි විද්‍යාඥයන්, ගොවියන්, ගොවි සංවිධාන මෙන්ම මේ පිළිබඳව සාමාන්‍ය දැනුමක් සහිත බොහෝ දෙනෙක් කරුණු කියා ඇති බවත් රණවක මහතා ප්‍රකාශ කලේය.
