ජනතාව හිස් පිඟාන අතේ තබාගෙන සිටින මොහොතක ආණ්ඩුවේ අජිත් නිවාඩ් කබ්රාල් ඇතුළු කිහිප දෙනෙක් කල්දේරම් පිටින් බෙදාගත හැකි නීති සකසන බව අයිතීන් උදෙසා කාන්තාවෝ සංවිධානයේ ලේකම් ජනතා විමුක්ති පෙරමුණේ නාගරික මන්ත්‍රිනී සමන්මලී ගුණසිංහ පැවසුවාය.
තමන්ගේත් තම හිතවත් කූට ව්‍යාපාරිකයන් අතළොස්සකගේත් පොකැට්ටුව පුරවාගත හැකි නීති සැකසීම කෙතරම් නිර්ලජ්ජිත ක්‍රියාවක් දැයි මන්ත්‍රීවරිය ප්‍රශ්න කළාය.
එමෙන් ම, රාජපක්ෂ ආණ්ඩුව බලයට ආ දා සිට ජාතික වශයෙන් වැදගත් එකදු පනතක් හෝ පාර්ලිමේන්තුවට ඉදිරිපත් කර නොමැති අතර අවම තරමින් පොරොන්දු වූ පරිදි අසරණ ජනතාවගේ ක්ෂුද්‍ර මූල්‍ය ණය කපා හැරීමවත් නොකර ආණ්ඩුව ජාවාරම්කාර ව්‍යාපාරිකයන්ගේ ගිණුම් තර කිරීමට යෑම බරපතළ කාරණයක් බව ද ඇය පෙන්වා දුන්නාය.
රටේ බදුවලට පොලු තබා ඇත්තේ සාමාන්‍ය ජනතාව නොව මහා පරිමාණයෙන් හා නීති විරෝධීව ආදායම් උපයන ව්‍යාපාරිකයන් හා දේශපාලකයන් අතළොස්සක් බවත් ඉදිරියේදී රටේ අනාගතය ගැන කිසිදු පැහැදිලි භාවයක් නොමැති බවත් ගුණසිංහ මහත්මිය වැඩිදුරටත් පැවසුවාය.